الفرق بين الرول والاسكربت في سيرفر المايكروتك

سكربت دمج - سكربت فصل تصفح .... الخ

هو ايه الاسكربت دا

هل اي كواد اشوفها خاصة بالمايكروتك اقول دا سكربت ولا تبقى رول ؟؟

ايه الفرق بين السكربت وبين الرول اصلا ؟؟

اولا الرول بالانجليزية role يعني دور والمقصود بيه هنا وظيفة

ايه هو الرول ؟؟

الرول دا من اسمه كدا هو امر بيروح ينفذ وظيفة ما داخل المايكروتك ؟

يعني ايه يعني مثلا الامر دا

/interface disable ether1

دا رول عبارة عن امر مباشر انا قولت فيه للسيرفر روح لـ interface واعمل disable او تعطيل للكارت اللي اسمه ether1

يبقى افهم من كدا ان الرول دا عبارة عن امر او وظيفة بنفذها بشكل مباشر واقدر اعملها بالوينبوكس عادي لان الوينبوكس ما هو الا برنامج بيتصل بالمايكروتك واما انت تضغط على زرار عشان ينفذ وظيفة معينة الوينبوكس بيرسل الوظيفة دي للسيرفر على شكل امر يتم تنفيذه

نيجي للاسكربت ايه هو وايه الفرق بينه وبين الرول ؟

السكربت حاجة مختلفة شوية لان الاسكربت مش امر بيتنفذ بشكل مباشر زي الرول

السكربت اقرب لانه يكون لغة برمجة داخل المايكروتك يعني ايه

يعني السكربت بيحتوي على امكانية تعيين متغيرات ودوال وشروط وبناء على قيم المتغيرات دي اقدر اتخذ قرارات وانفذ اوامر معينة

ايه ياعم الكلام الكبير دا

هقولك ما تشغلش بالك دلوقتي بالكلام دا اوي المهم انك تعرف ان الاسكربت بيبقى شبه الكود دا كدا

{/ip arp print file=mauro;
:local i [/ip arp print count-only];
:for a from=0 to=($i - 2) do={:log [/ip arp print $a ]}

لاحظ هنا ان في دالة زي for ودي دالة تكرار وفي متغير زي i ودا متغير بيحمل قيم معينة بناء عليها انا بتخذ قرار عن طريق دالة do

مش مهم تعرف الدوال والكلام دا الوقتي

المهم انك تاخد بالك ان داخل السكربت في الامر دا

/ip arp remove $i

ودا رول

يبقى كدا نفهم ايه وخلاصة الكلام دا كله ايه ؟؟؟

خلاصة الكلام دا ان الرول امر مباشر بينفذ وظيفة معينة بشكل مباشر

اما السكربت فدا مجموعة اوامر بتتكتب بلغة برمجة ما داخل المايكروتك لتنفيذ عدة وظايف واتخاذ قرارات ودا اكبر واشمل واكتر تعقيد من الرول ويمكن للاسكريبت ان يحتوي بداخله رول او مجموعة من الرولات

يبقى المرة الجاية اما تفتح كود دمج او فصل تصفح اعرف ان دا رول مش سكربت

واما حد يقولك سكربت دمج او فصل قوله لأ ياعم دا رول لان دا عبارة عن اوامر مباشرة بتنفذ مهام محددة بشكل مباشر على السيرفر لكن السكربت بيبقى كود مكتوب بلغة برمجة لتنفيذ مجموعة مهام معينة وعنده القدرة انه يحلل البيانت ويتخذ قرارات مختلفة 

يبقى انت كدا فهمت ما حفظتش وبتردد كلام وخلاص .. ودا الهدف من الصفحة دي 

وان شاء الله يكون لينا لقاء في عدة دروس للتعامل مع المايكروتك بدون وين بوكس عن طريق الرولات عشان تقدر تفهم وتقرأ الرولات وتعرف هي بتعمل ايه وراحة فين وجاية منين

وبرده يكون لينا لقاء في طريقة كتابة الاسكربتات بس اما تفهم الرولات الاول 

خالد جاد ..LeRoi